"Yüksəliş" müsabiqəsi qaliblərinin tələbələrlə Mentorluq proqramı çərçivəsində növbəti görüşü keçirilib. 

Birinci “Yüksəliş” müsabiqəsinin qalibi Ramtiq Alızadə mentiləri Lamiyə Həşimova, Leyla Mirzəyeva və Aydan Həmidova ilə Kaspi Təhsil Şirkətində görüş keçirib. İlk olaraq tələbələrə şirkətin fəaliyyəti, iş prinsipi, strukturu, mövcud karyera imkanları barədə məlumat verilib. Daha sonra şirkətin Marketinq şöbəsinin əməkdaşları tərəfindən marketinq metodları, sosial mediada marketinqin idarə olunması, kontent yaradılması, marketinqdə dizaynın rolu və s. mövzularını əhatə edən təqdimatlar edilib, mövzular ətrafında müzakirələr aparılıb.

Tələbələr üçün Mentorluq proqramının əsas məqsədi 3-cü və 4-cü kurs tələbələrinin “Yüksəliş” müsabiqəsinin qaliblərinin idarəçilik təcrübəsindən yararlanmasını və gələcək karyera fəaliyyəti ilə bağlı tövsiyələr almasını təmin etməkdir. Mentorluq proqramının sonunda “Yüksəliş” müsabiqəsinin qalibləri tərəfindən tələbələrə tövsiyə məktubu təqdim ediləcək.

“Yüksəliş” müsabiqəsinin təşəbbüsü ilə start götürən proqrama 65 nəfər tələbə qəbul olunub. Seçim tələbələrin tərcümeyi-halı və motivasiya məktublarına əsasən həyata keçirilib. Proqramın 2024-cü ilin iyun ayının sonunadək davam etməsi gözlənilir.

“Yüksəliş” müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla təsis olunub. Müsabiqə qalibləri mentorlar (https://yukselish.az/mentors.html) tərəfindən birillik fərdi inkişaf planı və hər biri 20 min manat məbləğində özünüinkişaf üçün pul mükafatı əldə edirlər.

Növbəti, sayca dördüncü “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 25 dekabr 2023-cü il tarixində müvafiq Sərəncam imzalanıb.