Əmək və əhalinin sosial müdafiəsi naziri Sahil Babayev nazirlikdə mentorluq proqramını uğurla başa çatdıran üçüncü “Yüksəliş” müsabiqəsi qalibləri İlahə Baxışova Tahirli və Toğrul Ələkbərov ilə görüşüb.

Nazir onları mentorluq proqramını uğurla başa çatdırmaları münasibətilə təbrik edib,  gələcək fəaliyyətlərində yeni nailiyyətlər arzulayıb. O, Prezident İlham Əliyevin Sərəncamına əsasən təsis olunan “Yüksəliş” müsabiqəsinin intellektual səviyyəsi, idarəçilik keyfiyyətləri yüksək perspektivli rəhbər şəxslərin müəyyən edilərək dəstəklənməsi, kadr ehtiyatı bankının yaradılmasında önəmini vurğulayıb.

Hər iki mentinin bilik və təcrübə imkanlarını artırmaları, potensiallarını inkişaf etdirmələri üçün birillik proqram çərçivəsində müvafiq şəraitin yaradılması, bu istiqamətdə dəstəklə təmin edilmələri üçün görülmüş işlərdən bəhs olunub.

Onlar üçün nazirlikdə və nazirliyin qurumlarında görüşlərin keçirildiyi, habelə bir sıra tədbirlərdə iştirakının təmin edildiyi qeyd edilib. Mentilərə sosial sahədə son illər aparılan islahatlar, DOST konsepsiyası barədə ətraflı məlumatlar verildiyi bildirilib.

İ.Baxışova Tahirli və T.Ələkbərov mentorluq proqramı çərçivəsində onların bilik və bacarıqlarının, liderlik potensiallarının inkişaf etdirilməsi üçün yaradılan şəraitdən, göstərilən dəstəkdən razılıqlarını ifadə ediblər.

Görüşdə proqram çərçivəsində görülmüş işlərə, mentilərin fəaliyyət planlarının icrasında əldə etdikləri nailiyyətlərə dair fikir mübadiləsi aparılıb, onlara tövsiyələr verilib.

"Yüksəliş" müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixli Sərəncamı ilə təsis edilib. Müsabiqənin qalibləri mentorlar tərəfindən birillik fərdi inkişaf planı ilə təmin olunur və 20 min manatlıq mükafat qazanırlar.

Beşinci “Yüksəliş” müsabiqəsinin keçirilməsi barədə Azərbaycan Respublikasının Prezidenti cənab İlham Əliyev 18 dekabr 2024-cü il tarixində müvafiq Sərəncam imzalayıb.