Qaliblərimiz tələbələrin gələcək karyeralarına dəstək olmağa davam edirlər

Qaliblərimiz tələbələrin gələcək karyeralarına dəstək olmağa davam edirlər!

Mentorluq proqramı çərçivəsində birinci "Yüksəliş" müsabiqəsinin qalibləri Orxan Qazı zadə və Ruslan Mirzəliyev mentiləri Cavid Mirzəzadə, Nihad Rəhimli, Aişə Həbillayeva, Yusub Rüstəmov və Nuranə Murğuzova ilə görüş keçiriblər. 

5 saylı Bakı DOST Mərkəzində baş tutan görüşdə tələbələr hazırkı fəaliyyətləri barədə mentorlarını məlumatlandırıb və gələcək görüşlərdə müzakirə ediləcək mövzuları qərarlaşdırıblar.

Görüşdən sonra tələbələr infoturda iştirak ediblər və Mərkəz haqqında ətraflı məlumat əldə ediblər.

“Yüksəliş” müsabiqəsinin təşəbbüsü ilə start götürən proqrama 65 nəfər tələbə qəbul olunub. Seçim tələbələrin tərcümeyi-halı və motivasiya məktublarına əsasən həyata keçirilib. Proqramın 2024-cü ilin iyun ayının sonunadək davam etməsi gözlənilir.

“Yüksəliş” müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla təsis olunub. Müsabiqə qalibləri mentorlar (https://yukselish.az/mentors.html) tərəfindən birillik fərdi inkişaf planı və hər biri 20 min manat məbləğində özünüinkişaf üçün pul mükafatı əldə edirlər.

Növbəti, sayca dördüncü “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 25 dekabr 2023-cü il tarixində müvafiq Sərəncam imzalanıb.