Vəkillər Kollegiyasının sədri Anar Bağırov "Yüksəliş" müsabiqəsinin mentorluq proqramı çərçivəsində layihənin qalibi ilə görüşüb
Layihənin idarəçi rəhbərlərindən biri olaraq Anar Bağırov bir illik fərdi inkişaf planı əsasında müsabiqə qalibi - Orxan Qazı zadə ilə sıx əməkdaşlıq edəcəyini, onunla təcrübəsini bölüşəcəyini və beləliklə, potensialını üzə çıxarmasına köməklik göstərəcəyini diqqətə çatdırıb. Tanışlıq görüşündə fərdi inkişaf planı çərçivəsində ətraflı fikir mübadiləsi aparılıb.
Müsabiqənin şərtlərinə əsasən, qalib bir il müddətində müsabiqənin idarəçi rəhbəri ilə mentorluq proqramı çərçivəsində əməkdaşlıq edərək təcrübə keçəcək.
“Yüksəliş” müsabiqəsi 21-51 yaş aralığında, iki illik idarəçilik təcrübəsi olan, ali təhsilli Azərbaycan Respublikasının vətəndaşlarını əhatə edir. Müsabiqə 5 mərhələdən - qeydiyyat, onlayn seçim, əyani, yarımfinal və finaldan ibarətdir. Müsabiqədə ümumilikdə 11.760 nəfər qeydiyyatdan keçib. Onlardan 9.775 nəfəri müsabiqəyə qəbul edilib.
